بصوا يا بنات ..
دلوقت الاسعار بقت مولعة و كل حاجه بقت نار ,, طيب و الفرح اللي كل عروسة نفسها فيه ؟؟
طبعا اليومين دول يقولوا هنعمل خطوبة بسيطة في البيت و نعمل كتب كتاب في الجامع ونعزم الناس وخلاص .......بس كل عروسة بتبقى عايزة تفرح واهلها وبالذات مامتها .. وكمان العريس بيبقى نفسه لكن الايد قصيرة بقه
طب ايه الحل الوسط؟؟؟
بصي يا ست البنات .. اعملي حسابك انت و العريس تحوشوا من ساعة ما تتخطبوا لحد قبل الفرح كل واحد 5ج يعني كل واحد هيحوش في السنة 1800ج و انتو الاتنين 3600ج
و طبعا انتوا كده كده بتصرفوا يعني ال5ج دي مش هتحسوا بيها كانها بقشيش لاي حاجه ..
قبل الجواز هتكونوا عاملين حسابكم طبعا انتوا و الاهل على مبغ لعمل كتب الكتاب في المسجد بقه او في اي مكان ودا مش هيتكلف حاليا اقل من 6000ج
حطوا ال 6000 على 3600 على الفين كمان زيادة ويبقى المبلغ كله تقريبا 11500 او 12000 ج
طبعا المبلغ دا مش هيعمل حاجه واااااااااااااو في مكان تحفة دار او فندق وكده ... طيب نعمل ايه ّّ؟؟
هقولك الحل::::
احلى حاجه تعمليها انك تروحي فيلا من اللي بيتعرضوا قدامك حسب مكان سكنك يعني سكان الجيزه عادة بيروحوا فيلل الهرم و المنصورية و المريوطيه وطريق مصر اسكندرية ..
و سكان مصر الجديدة عادة بيروحو فيلل العبور و طريق الاسماعيلية بس اغلبهم فيهم مشاكل علشا الصوت و الوقت ...
و حاليا سكان التجمع و الرحاب و الشروق و مدينتي و مدينة نصر بيروحوا الفيلات اللي على طريق السويس او اللي جو المدن دي بس فيها مشاكل علشان التأخير و الصوت..
لما تعملي فرحك في فيلا بتوفري كتير جدا وبتعزمي عدد اكبر او حتى عدد يناسب ميزانيتك ..
انت هتاخدي الفيلا فاضية خالص جنينه بس .. و عندك حل من اتنين يا اما تظبطيها بنفسك بالمشاركة مع حد من قرايبك زي اخوك مثلا او تتفقي مع منظم افراح محترف بس شوفي حد سعره حنين ومتطلبيش ديكورات كتير علشان هي دي اللي بتاخد فلوس ...
المهم هتطلبي الكراسي و الترابيزات يعني لو فرحك 100 فرد مثلا يبقى انت محتاجه 10 ترابيزات كل واحده عليها 10 كراسي (سعر الترابيزة بالكراسي بيبدأ من ( 160 - 180ج تقريبا حسب النوع المكان )
و تطلبي منه شيزلونك بتاع الكوشة كمان ومش هيبقى غالي قوي ولا حاجه مش هيزيد عن 400 - 500ج وممكن تطلبي منه كوشه جاهزة على بعضها كمان بتتأجر من عند منظمي الافراح بتبدأ من 1200 - 2000ج حسب الديكورات اللي فيها و الورد ونوعه وكده ..
كده صرفنا كام ( تقريبا 2800ج فراشة وكوشة )
نبدأ بقة في باقي الحاجات ..
** دانس فلور ... مش ضرورية قوي ولو هتفرق معامي فاصغر مساحه 4*4 مثلا مش هتقل عن 1500ج (بلاش منها)
** سنتر بيس ... (الديكور او الفازة او الحاجه اللي بتتحط على الترابيزات ) هي بتعمل شكل حلو وفي ليها اسعار كتير بتبدأ من (30ج لحد 200ج او اكتر للقطعه ) بالتالي انت محتاجه 10قطع هنفرض ان الواحده 50ج يعني هتكلفك 500ج و دي بتتجاب من عند نفس المنظم اللي هتاخدي منه الكوشة .
** الاضاءات و الليزر ...الخ مالهمش لازمة قوي كلهم بس ممكن تعملي اضاءة زياده عند الكوشة مثلا علشان تبقى حلة في حدود 500ج - 1000ج
** مولد الكهرباء ... دا ضروري جدا لان اغلب الفيلات مفيهاش كهرباء تستحمل الاحمال دي .. المولد هيبدأ من 600ج حسب حجمه و انت هتحتاجي حاجه صغيرة اصلا .
** ويترات للخدمة والتقديم ... على الاقل هتحتاجي اتنين يوم العمل بتاعهم ب ( 150 الى 200ج )في الفرح يعني 400ج
** الدي جي ...
بيبدأ من 700 لحد 1500ج حسب السماعات و حسب حرفيته وسمعته ... اختاري الوسط
ب1000ج تقريبا واخوكي اكيد هيبقى عارف واحد :) بس نقي معاه الاغاني او
نوعيتها علشان متتصدميش :)
لحد دلوقت صارفين 5800ج تقريبا
ايجار المكان في حدود 4000 / 4500 جنيه فاضي علشان تبقي براحتك
كده يبقى صرفنا 10000 ج تقريبا
باقيلنا المشروبات و الاكل ... والنصيحه العظيمة انك تنسي موضوع الاوبن بوفيه علشان مكلف
ممكن تعمل (هاي تي ) تجيبي انت الحاجات دي ( ساليزونات - باتيهات - ميني ساندويتش - جاتوه سواريه ......الخ اي حاجه من الحاجات دي حسب امكانياتك الباقية اللي موفراها وتجيبي كان بيبسي لكل فرد + زجاجه مياه كبيرة لكل ترابيزة مثلا واعملي حسابك في زيادة علشان الاطفال بيعملوا ازمات وحبذا لو تخلي المعازيم ميجيبوش أطفال معاهم
لو مصرة تعملي اوبن بوفيه .. يبقى تتفقي مع شيف وتجيبيله انت الاكل كله و كل لوازمه وتخليه يروح يطبخ في نفس مكان الحفله في الفيلا و ساعتها الاكل هيبقى سخن وتحفة
ولو عايزين ترشيحات للفيلات هقولكم المره الجاية بقه
والف مليون مبروك يا بناااااااااااااااااااات
